ଆସିବ ମାନବ ବିହୀନ ସୌର ବିମାନ, ଶତ୍ରୁପକ୍ଷ ଉପରେ ରଖିବ ନଜର
ବେଙ୍ଗାଲୁରୁ: ଭାରତର ଅସ୍ତ୍ରଶସ୍ତ୍ରରେ ଏକ ମହତ୍ତ୍ୱପୂର୍ଣ୍ଣ ଅଂଶ ଯୋଡ଼ି ହୋଇଛି। ବୈଜ୍ଞାନିକମାନେ ଏକ ସୋଲାର ପ୍ଲେନ୍ ବା ସୌରଚାଳିତ ବିମାନ ଉଦ୍ଭାବନ କରିଛନ୍ତି। ଏହି ସୌର ବିମାନର ଅନ୍ୟାନ୍ୟ ବୈଶିଷ୍ଟ୍ୟ ମଧ୍ୟରେ ଥରେ ଚାର୍ଜ ହେଲେ ୯୦ଦିନ ପର୍ଯ୍ୟନ୍ତ ଉଡାଣ ଏହାକୁ ଅଧିକ ସ୍ୱତନ୍ତ୍ର ଭାବେ ପରିଚିତ କରାଇଛି। ତେବେ ପରୀକ୍ଷାମୂଳକ ଭାବେ ୧୦ ଘଣ୍ଟା ପାଇଁ ଏହାକୁ ସଫଳତାର ସହ ଉଡ଼ାଣ କରାଯାଇଛି। ପ୍ରକାଶ, ଏହାକୁ ବେଙ୍ଗାଲୁରୁ ସ୍ଥିତ ଏକ ଜାତୀୟ ଏରୋସ୍ପେସ୍ ଲାବୋରେଟୋରି (ଏନ୍ଏଏଲ୍) ଦ୍ୱାରା ବିକଶିତ କରାଯାଇଛି। ଏନ୍ଏଏଲ୍ ବୈଜ୍ଞାନିକମାନେ ଏହାକୁ ଅତ୍ୟନ୍ତ ସ୍ୱତନ୍ତ୍ର ଭାବେ ପ୍ରସ୍ତୁତ କରିଛନ୍ତି ଯାହାକି ଯୁଦ୍ଧ ସମୟରେ ଶତ୍ରୁ ଉପରେ ନଜର ରଖିବା ଏବଂ ପର୍ଯ୍ୟବେକ୍ଷଣ କରିବାରେ ସିଦ୍ଧହସ୍ତ। କେବଳ ସେତିକି ନୁହେଁ, ଏକ ନିର୍ଦ୍ଦିଷ୍ଟ ଓଜନର ଜିନିଷପତ୍ର ବହନ କରିବାକୁ ମଧ୍ୟ ଏହି ସୌର ବିମାନ ସକ୍ଷମ ଅଟେ। ମୋଟାମୋଟି ଏହି ବିମାନଟି ବାୟୁ ପ୍ରତିରକ୍ଷା ଅସ୍ତ୍ର ଭାବେ କାର୍ଯ୍ୟ କରିବ। ଏହା ହେଉଛି ଏକ ଚୌର ଚାଳିତ ସ୍ୱୟଂଶାସିତ ମାନବବିହୀନ ବିମାନ। ଯାହା ପୃଥିବୀର ୪ ମୁଖ୍ୟ ବାୟୁମଣ୍ଡଳର ଷ୍ଟ୍ରାଟୋସ୍ଫିୟର ସ୍ତରରେ ଉଡ଼ିବାର ସାମର୍ଥ୍ୟ ରଖୁଛି। ଏହି ସୌର ବିମାନ ୧୭-୨୦ କିଲୋମିଟର ଉଚ୍ଚତାରେ ଦିନରାତି କାର୍ଯ୍ୟ କରିବାରେ ସକ୍ଷମ ହୋଇପାରିବ। ଏକ ପେଲୋଡ୍ ସହିତ ଏକ ଏଚ୍ଏପିକୁ ଏକ ଉଚ୍ଚ-ଉଚ୍ଚତା ସିଉଡୋ ସାଟେଲାଇଟ୍ ବା ଏଚ୍ଏପିଏସ୍ କୁହାଯାଏ। ଏନ୍ଏଏଲ୍ର ଏଚ୍ଏପିଏସ୍ ପ୍ରୋଗ୍ରାମ ମୁଖ୍ୟ ଡକ୍ଟର ଏଲ୍ ଭେଙ୍କଟକ୍ରିଷ୍ଣନ୍ କହିଛନ୍ତି ଯେ, ସୌର ବିମାନ ଆକାଶରେ ରହି ନଜର ରଖିବାରେ ସକ୍ଷମ। ଏହା ଏକ ସାଟେଲାଇଟ୍ ତୁଳନାରେ ବହୁତ ଶସ୍ତା। ପ୍ରକାଶ, ବେଙ୍ଗାଲୁରୁରେ ଏକ ନୂତନ ସ୍ପେସ୍ ରିସର୍ଚ୍ଚ ଆଣ୍ଡ୍ ଟେକ୍ନୋଲୋଜି ନାମକ ଏକ ଷ୍ଟାର୍ଟଅପ୍ ମଧ୍ୟ ସମାନ ପ୍ରୋଟୋଟାଇପ୍ ବିକଶିତ କରିଛି।
